No seu primeiro mes de exhibición, A derradeira leición do mestre demostrou que a expectación que xerara a súa chegada a Pontevedra estaba máis que xustificada.
Desde a súa apertura ao público o pasado 25 de xuño, o cadro de Castelao foi visto por 6.707 persoas, segundo recolle o balance do Museo de Pontevedra.
Estas cifras, apuntan os seus responsables, superan "amplamente" o volume habitual de visitas aos edificios principais do Museo nesta época do ano.
Para o vicepresidente da Deputación de Pontevedra, Rafa Domínguez, este interese é a "mellor recompensa" ao traballo realizado nos últimos anos para situar ao Museo de Pontevedra "no lugar que se merece".
A chegada a Pontevedra de A derradeira leición do mestre "non é un feito illado, senón unha mostra do momento extraordinario que vive esta institución", engadiu.
Castelao. A derradeira leición do mestre é o título da exposición organizada ao redor deste cadro que Castelao pintou en Buenos Aires en 1945.
O lenzo preséntase no centro da sala, como único elemento do muro principal, para chamar a atención sobre as súas considerables proporcións, 2 metros de alto por 1,36 de ancho, e a súa forza dramática.
A pintura foi concibida nun contexto de forte carga política e simbólica ao representar o fusilamento de Alexandre Bóveda, figura clave do galeguismo e amigo persoal do artista, que é a figura que protagoniza o cadro.
Desde 1979 o cadro pertence á colección do Centro Galicia de Bos Aires, herdeiro das asociacións da emigración galega na Arxentina, que o cedeu temporalmente para esta exposición.
Nas paredes laterais da mostra están os materiais que lle dan contexto.
Así, na primeira vitrina sitúase a primeira edición de Sempre en Galiza e o manuscrito orixinal, que titulou Co pensamento en Galicia, a obra na que recolle o seu pensamento político.
Ademais, na exposición móstrase o debuxo orixinal de 1937 da estampa núm. 6 de Galicia mártir, titulado A derradeira lección do mestre e que oito anos despois reproduciría no famoso cadro.
A exposición do cadro manterase até o 27 de setembro e inclúe visitas guiadas gratuítas todos os mércores e xoves ás 18:00 horas e os sábados ás 12:00 horas.
Até agora, unhas duascentas persoas participaron nas visitas programadas ao longo das últimas semanas.
Engade Pontevedra Viva como fonte preferida de Google de balde
Mantente informado coas últimas noticias de actualidade.