Concello de Soutomaior e ANPA do IES Soutomaior veñen de solicitar reunións con responsables autonómicos do ámbito educativo para buscar unha solución á tesitura que se expón para o próximo curso aos alumnos de primeiro curso de Bacharelato.
Segundo explica o Concello a través da ANPA, non haberá materias de Latín e Debuxo Técnico seguindo "o criterio de non impartir materias con menos de cinco alumnos matriculados". Segundo engaden, até agora esa excepción salvábase, pero no curso 2026-2027 "no marco das medidas de recorte aplicadas pola Inspección Educativa, a autorización foi denegada".
O alumnado de primeiro curso escolle entre Latín e Matemáticas Aplicadas ás Ciencias Sociais, circunstancia que neste caso de Soutomaior non sería posible e que faría inviable que en segundo de Bacharelato puidesen cursala "o que supón unha importante desvantaxe para o alumnado que queira acceder a graos relacionados coas Humanidades".
Debuxo Técnico é unha materia troncal da modalidade de Ciencias e Tecnoloxía e igualmente é unha materia que puntúa para a nota de acceso á universidade.
Como engade a parte prexudicada, "como alternativa, Educación ofrece que ambas as materias poidan cursarse en liña e os estudantes examínense presencialmente en Santiago de Compostela. Unha opción que consideran "non garante unha formación equivalente xa que se trata de materias cun alto contido práctico e técnico nas que a docencia presencial resulta fundamental para a correcta aprendizaxe".
En defensa da súa argumentanción, a ANPA engade que a profesora de Latín ten destino definitivo no Instituto e impartirá outras materias "polo que existen recursos para manter esta materia"; situación que non se reproduce para impartir Dibujo Técnico.
Nesta tesitura, o IES Soutomaior solicitou formalmente ante a Consellería manter Latín en 1º de Bacharelato; a ANPA presentará un escrito ante a Inspección Educativa para que se autorice impartir esa materia e "reclamar solucións que permitan ampliar a oferta educativa do alumnado"; e o Concello de Soutomaior solicitou unha reunión urxente coa Xefatura Territorial de Educación para analizar esta situación e "buscar unha solución que evite que os alumnos queden en inferioridade de condicións respecto dos doutros centros educativos de Galicia".
Engade Pontevedra Viva como fonte preferida de Google de balde
Mantente informado coas últimas noticias de actualidade.