O Día Internacional Forestal, tamén chamado Día da Árbore, celebrouse en Caldas de Reis da mellor maneira, con traballo de campo.
Alumnos do IES Aquis Celenis e do CEIP San Clemente de César participaron nunha xornada de plantación con motivo desta conmemoración.
A actividade tivo que adiantarse uns días debido ás predicións meteorolóxicas.
Alló estiveron tamén o alcalde Jacobo Pérez, e o concelleiro responsable da área de Medio Ambiente, Juan Carlos Ortigueira.
Foi unha xornada desenvolvida en colaboración das comunidades de montes do municipio, contou coa presenza de axentes rurais e supuxo a plantación dun cento de novos exemplares.
En concreto procedeuse á plantación de madroños, castiñeiros, cerdeiras e nogueiras.
Unha actividade que "non só serve para continuar concienciado ás futuras xeracións da necesidade de respectar o medio ambiente, senón que tamén é unha actuación que axuda a potenciar o pulmón verde de Caldas de Reis", afirmou o alcalde.
O Día da Árbore comezou a conmemorarse en Caldas de Reis a principios dos 2.000, colaborando activamente na reforestación de diversas zonas do municipio.