Escolares do CPI Toural de Vilaboa comezaron nos últimos días a súa andaina dentro do proxecto de educación para o desenvolvemento 'Cooperación Galega: O Mundo que queremos'. A súa estrea foi cun obradoiro de educación en valores impartido por Rosa López co obxectivo de "crear un vínculo co alumnado e fomentar neles a corresponsabilidade de crear un mundo mellor entre todos e todas, que sintan que son parte do cambio", pero inclúe tamén actividades de radio, fotografía e teatro e, ao remate, convida ao alumnado a crear a súas propias propostas comunicativas a través de proxectos de radio e fotografía.
Segundo explicou a responsable do obradoiro, "tentamos explicarlles dunha maneira moi visual as desigualdades e a inxustiza social que habita no noso mundo, utilizando unha dinámica que mostra a disparidade no reparto de terras e riqueza a nivel mundial e tamén mostrarlles as consecuencias dun consumo irresponsable e egoísta".
O proxecto 'O Mundo que queremos' incide sobre o traballo da cooperación internacional, as desigualdades sociais e as causas que as perpetúan, facendo partícipe desta problemática ao alumnado e remarcando o seu papel transformador na consecución dun mundo máis xusto Chega nesta terceira edición a dous centros educativos da provincia de Pontevedra, o de Vilaboa e o CPI Aurelio Marcelino Rey García de Cuntis.
O proxecto chega este ano a catro educativos das provincias da Coruña e Pontevedra, o que supón a participación de 512 alumnos e 14 profesores. Está a ser executado polas ONGD Solidariedade Internacional de Galicia, Asociación Galega de Reporteiros Solidarios (Agareso) e Educo, coa colaboración organizativa e formativa de Mundo Cooperante Galicia, Asemblea de Cooperación Pola Paz (ACPP), Tempo de Loaira e o grupo de Teatro dxs oprimidxs '100tolas'.