A área sanitaria de Pontevedra e O Salnés contabiliza este venres 24 de abril 550 casos activos de coronavirus, un incremento de 15 positivos máis con respecto a un día antes que, con todo, non se reflicte na cantidade de pacientes hospitalizados. O número de ingresados nos hospitais da área sanitaria mantense sen variacións.
Segundo a información oficial facilitada polo Servizo Galego de Saúde, hai 30 hospitalizados, dos que cinco son pacientes que evolucionan en UCI e 25 están ingresados en planta, 2 deles no Hospital do Salnés e 1 en QuirònSalud Miguel Domínguez.
Os 520 casos restantes están en domicilio, ata 550 casos activos fronte aos 535 do xoves.
Desde o inicio do plan de continxencia do COVID-19 faleceron nesta área sanitaria 15 pacientes e prescribíronse 153 altas hospitalarias, ningunha nas últimas 24 horas.
A nivel autonómico, a Dirección Xeral de Saúde Pública da Consellería de Sanidade informa que, na última actualización, o número de casos activos de coronavirus en Galicia ascende a 6.704, deles 1.584 son da área da Coruña, 647 da de Lugo, 1.302 da de Ourense, 550 da de Pontevedra, 1.169 da área de Vigo, 1.065 da de Santiago, e 387 da de Ferrol.
Do total de pacientes positivos, 87 permanecen en UCI, 531 están en unidades de hospitalización e 6.086 no domicilio. Polo de agora, en Galicia rexistráronse 1.730 altas de pacientes e 498 falecementos.
O número de PCR realizadas é de 78.822 e o número de casos de coronavirus detectados en centros residenciais de servizos sociais de Galicia supoñen o 3,7% do total das persoas residentes. En total, contabilízanse 897 positivos en usuarios e 347 en profesionais. Faleceron 116 persoas en residencias e 113 en hospitais e residencias integradas.
A Consellería de Sanidade reitera que a cidadanía empregue o número 061 só para emerxencias ou casos graves e aconsella utilizar o número gratuíto do 900 400 116 para consultar dúbidas ou síntomas leves de coronavirus.
O Sergas ten ao dispor da cidadanía unha páxina web (https://coronavirus.sergas.es), na que se pode consultar información dirixida á poboación, aos profesionais sanitarios e a outros colectivos.