Varios empresarios de Marín denunciaron recibir chamadas para colaborar economicamente na edición dunha suposta revista policial que, segundo confirman as autoridades, non existe.
A Policía Nacional advirte que se trata dun timo mediante o que os estafadores solicitan doazóns para unha suposta revista a cambio de publicidade.
O modus operandi consiste en poñerse en contacto con pequenos empresarios da zona que queren dar publicidade aos seus negocios e contactan con eles por teléfono en nome de supostas asociacións profesionais da Policía Nacional.
Tras pedir unha achega económica, ofrecen inserir anuncios publicitarios na revista a cambio dunha cantidade de diñeiro, normalmente pequenas cantidades.
Ao recibir o diñeiro, os seus responsables contactan coa vítima e dinlle que en breve comparecerán no seu negocio para entregarlles a revista, cousa que finalmente nunca ocorre.
É unha práctica, sinalan desde a Policía Nacional, que só persegue o lucro persoal dos estafadores á conta dos empresarios aos que logran enganar.