O Concello de Vilagarcía activará un dispositivo extraordinario para afrontar a previsión de alta participación na Festa da Auga deste sábado 16, que inclúe por primeira vez a instalación e monitorización de cámaras nas áreas máis concurridas desde un Posto de Mando Avanzado situado na praza de Ravella.
O operativo de seguridade artellarase en varias capas: a Policía Local reforzará quendas con 16 axentes pola mañá (para o traslado do santo e a previa da festa), 12 pola tarde e 10 durante a noite.
Tamén están previstos efectivos procedentes doutros municipios e a colaboración de axentes da Garda Civil e da Policía Nacional.
En materia sanitaria, o Servizo Municipal de Emerxencias duplicará parte do seu persoal de garda: haberá dous equipos de primeiros auxilios e intervención rápida patrullando a cidade durante toda a noite (catro axentes no total) e oito persoas en servizo de garda.
Instalarase un hospital de campaña na praza da Peixería e disporase de dúas ambulancias durante a xornada: unha de soporte vital básico con médico e dous técnicos e, a partir das 11:00 horas, engadirase outra de soporte vital avanzado con médico/a, enfermeiro/a e dous técnicos.
As persoas que precisen atención poderán ser atendidas no hospital de campaña, derivadas ao Punto de Atención Continuada (ambulatorio de San Roque) ou ao Hospital do Salnés segundo as necesidades.
Co obxectivo de garantir unhas festas "libres, respectuosas e seguras", o Concello habilita un Punto Lila na praza da II República (xunto á zona de ocio do porto, a avenida da Mariña e a Alameda) que funcionará de 00:00 a 08:00 horas e estará atendido por persoal especializado para previr e atender agresións ou faltas de carácter sexual.
Finalmente, o dispositivo de limpeza tamén se reforzará: a concesionaria Urbaser mobilizará 68 traballadores en quendas (32 pola mañá e 36 pola tarde).
A quenda matinal centrará os esforzos na praia, no parque Miguel Hernández e na zona TIR; a vespertina incidirá no centro da cidade e nas rúas polas que discorrerá a procesión.