José Fuentes Alende pode afirmar que é recoñecido na súa terra. O ex secretario técnico do Museo de Pontevedra presentou este venres en Cuntis, o seu municipio, o seu libro Os exvotos en Galicia. A súa significación na relixiosidade popular con éxito de asistencia.
O acto celebrouse na Biblioteca Municipal Roberto Blanco Torres e contou cunha gran asistencia de público. No acto participou o alcalde, Manuel Campos, que lembrou que o traballo de Fuentes Alende gañou no ano 2017 o premio de investigación Olimpio Arca.
Campos fixo fincapé na calidade e a dedicación deste traballo, no que se analizan os exvotos, as ofrendas que tradicionalmente se realizan aos santos, a modo de obsequio a modo de gratitude ou de devoción.
"Estamos a falar dun labor impecable, rigoroso e moi profesional, dunha persoa que para nós é un auténtico referente como é José Fuentes", sinalou o alcalde sobre este libro que supón un percorrido pola historia e significado duns elementos característicos da relixiosidade popular galega.
A publicación consta de dous volumes, nos que recolle un labor de investigación que comezou no ano 1987 sobre este tipo de ofrendas, tan típicas e arraigadas dentro da tradición galega.