O presidente da Deputación, Rafael Louzán, felicitouse pola "extraordinaria acollida" do plan para a substitución de caldeiras de gasóleo por caldeiras de biomasa que está a impulsar a Administración provincial.
Nestes momentos xa se acadou a adhesión formal de 50 dos 54 concellos que teñen caldeiras de gasóleo nos seus edificios públicos, subliñou este venres, na rolda de prensa posterior á Xunta de Goberno.
Nos concellos adheridos substituiríanse un total de 98 caldeiras, delas 40 corresponden ás propias casas do concello, 23 a instalacións deportivas e as restantes a bibliotecas, centros sociais ou culturais, escolas infantís ou auditorios.
O obxectivo deste programa, que o presidente da Deputación xa anunciou que se desenvolverá en colaboración e de forma coordinada coa Xunta de Galicia, ten por obxecto conseguir un notable aforro económico (que se estima por riba do 45%) e, sobre todo "promover unha política ambiental respectuosa co contorno e sustentable no tempo". A maiores do aforro económico, a aposta pola biomasa implicará unha redución da emisión de CO2.
ASISTENCIA TÿCNICA
Para avanzar neste programa, a Deputación de Pontevedra vai poñer en marcha a contratación dunha asistencia técnica que elabore os anteproxectos de obra e os estudos económicos para cada unha das 98 instalacións.
Os anteproxectos incluirán tanto os traballos necesarios para a substitución da maquinaria e da tubaxe dos sistemas de calefacción e auga quente sanitaria, como a obra civil complementaria que resulte preciso realizar para a instalación dos novos mecanismos.