Rafa Domínguez contará esta fin de semana con grandes apoios no congreso no que será reelixido como líder do PP local de Pontevedra. O congreso no que o actual presidente en funcións é o único candidato contará coa presenza do actual presidente nacional do partido, Alberto Núñez Feijóo, pero tamén do ex presidente e pontevedrés de adopción Mariano Rajoy.
Ao acto, previsto no hotel Galicia Palace de Pontevedra, tamén está confirmada a asistencia doutros dous pontevedreses destacados no Partido Popular, o presidente provincial do partido e candidato único a liderar a formación en Galicia, Alfonso Rueda; e a ex ministra e actual vicepresidenta do Congreso Ana Pastor.
Todos arrouparán a Rafa Domínguez na súa reelección durante o XIII Congreso da formación local, no que será, en palabras do protagonista, "un dos días máis importantes da miña carreira política".
Domínguez avanzou que este sábado comezará "un percorrido ilusionante", pois vai presentar o seu proxecto de cambio, acompañado polo seu equipo e ante os afiliados do partido.
Mentres ultima xa os últimos detalles do congreso, o candidato e presidente en funcións deu as grazas adiantadas a todas as persoas que o van acompañar, nunha xornada que será de "profunda emoción".
Preséntase á reelección convencido de que "Pontevedra pide cambio", xusto a palabra, "cambio", que emprega como lema da súa campaña. Ante esta nova etapa, asegura que no PP están "máis preparados ca nunca".
O presidente do acto será o ex alcalde Juan Luis Pedrosa; a vicepresidenta, Raquel Souto; a secretaria, María Treviño; e os vocais, Juan Carlos Abeigón e Francisco Dapena.