Música, compras e, sobre todo, moito marisco, danse cita desde este xoves no Grove. Xa está aquí a edición número 51 da Festa do Marisco, que se celebrará ata o 13 de outubro.
O xoves inaugurouse a carpa coa oferta gastronómica e tamén a programación musical cos concertos de Caballito e Freshkiños e este venres chegaron tamén as compras coa Feira de Oportunidades de Grovestock.
Situada na zona comercial da praza do Corgo, esta feira ofrece a oportunidade de comprar produtos con descontos atractivos para incentivar a venda nos establecementos locais e levar un agasallo de recordo desta edición da festa.
O director xeral de Comercio e Consumo, Gabriel Alén, e o alcalde, José Antonio Cacabelos, participaron na inauguración da feira, organizada polo centro comercial aberto (CCA) De Tendas do Grove durante toda esta fin de semana, ata o domingo 6 de outubro.
Este venres, a programación musical levará ata a carpa de concertos a Mondra, The Rapants e DJ Djow.
Durante as xornadas do sábado e domingo, as casetas de venda e degustación de marisco abrirán a partir das 11.30 horas pola mañá e das 19.30 pola tarde.
Ás 13.00 horas haberá sesión vermú e ás 17.00 horas, sesión de tarde na carpa da cafetería e de 17.00 a 19.30 haberá actividades infantís con xogos tradicionais.
Ademais, o sábado ás 12.00 horas no Campo de Regatas do Porto do Grove celebrarase a Regata de Dornas a vela e na carpa de concertos actuarán Carlangas e Os Cubalibres, Delaporte e Serial Killerz.
O domingo, ás 9:30 horas será a quenda do Encontro Internacional de Scooter Clásicas e ás 10.30 horas, a Carreira Festa do Marisco.
Ao mediodía, ás 12.00 horas, na Praza do Corgo haberá unha actuación de baile tradicional Asociación Cantodorxo e ás 21.00 horas actuarán a carpa de degustación as Pandeireteiras de Cantodorxo.
Continuando coa programación musical, ás 22.00 horas, na carpa de concertos actuarán Cinco en Zocas e Guadi Galego.