Un espectáculo pirotécnico puxo este xoves o broche de ouro á visita dos Reis Magos a Sanxenxo. Os fogos de artificio, suspendidos en Noitevella polo mal tempo, iluminaron a noite da localidade con máis de 100 efectos e formas diferentes.
Durante 11 minutos, a visita dos Magos de Oriente encheuse de luz e maxia, como colofón a toda unha xornada na que as súas Maxestades percorreron todo o municipio.
A visita real empezou xa pola mañá. Melchor, Gaspar e Baltasar percorreron o municipio a bordo dun Tren Mago que, desde o porto deportivo, percorreu as parroquias anunciando a visita real da tarde.
Xa pola tarde, ás 16:30 horas, comezou a Recepción Real na Sala Nauta para que os nenos e nenas puidesen ver de preto aos Reis, abrazalos e trasladarlles as súas peticións de agasallo.
Non faltou á cita a tradicional Danza de Reis na Praza dos Barcos e tampouco a cabalgata, que a partir das 19.00 horas, e encabezada polo Tren Mago, levou a Melchor, Gaspar e Baltasar e as súas tres carrozas polo centro da vila ata Portonovo.