O Concello de Vilagarcía aprobou o proxecto de substitución das luminarias do paseo marítimo, dotado cun orzamento de 496.000 euros procedentes dos fondos europeos Next Generation.
A actuación prevé instalar 54 novos farois de alta eficiencia enerxética que substituirán os 101 puntos de luz actuais, en mal estado e obsoletos.
Os novos báculos, deseñados polo escultor local Elías Cochón baixo o modelo "Seabird", terán carácter escultórico e fabricaranse en aceiro cortén.
Haberá dous tipos: 48 farois de dobre brazo e 7,5 metros de altura desde o Ramal ata o lavadoiro, e 8 de brazo único e 6 metros na zona máis estreita, ata o parque infantil fronte ao Hotel Carril.
A renovación permitirá aforrar 17.000 euros anuais en gasto eléctrico, reducir o consumo en 73.554 kWh e diminuír as emisións de CO2 en máis de 26 toneladas ao ano. Ademais, a mellora enerxética alcanzará o 79%.
O proxecto sairá a licitación nos vindeiros días e a empresa adxudicataria terá catro meses de prazo de execución desde a firma da acta de replanteo.
O proceso deberá estar rematado antes de fin de ano, polo que o paseo marítimo lucirá nova imaxe no verán de 2026.
O deseño exclusivo pretende converter as luminarias nun elemento singular e identificativo de Vilagarcía, que poderá replicarse no futuro na reforma do peirao do Ramal.