A UNED de Pontevedra programou o curso "Ciberseguridade e Responsabilidade Dixital na Empresa: Riscos Reais, Normativa NIS2 e Cultura Organizativa", que se desenvolverá entre o 17 e o 24 de marzo.
Esta actividade ten como finalidade o estudo dos desafíos de seguridade dixital que afectan tanto ao sector privado como ás administracións públicas.
O programa, de matrícula gratuíta, consta de 10 horas lectivas e ofrécese nas modalidades presencial e online.
A coordinación corre a cargo de Rafael Cotelo Pazos e o equipo docente está formado polos especialistas Judit Meiriño Maquieira, Sergio González García, Raúl Fuentes Núñez e Hugo Fuentes.
O temario divídese en tres xornadas onde se examinan ameazas como o ransomware, o phishing e a enxeñaría social.
Tamén se aborda o marco legal derivado da directiva europea NIS2 e do Regulamento Xeral de Protección de Datos (RGPD).
Os asistentes traballarán na creación de plans de actuación ante incidentes e coñecerán medidas técnicas como a autenticación multifactor e a xestión de copias de seguridade.
As sesións inclúen simulacións de crises para a toma de decisións e unha análise técnica de ataques reais.
O curso está orientado a persoas interesadas na seguridade dixital, principalmente a persoal da administración pública, profesionais da xestión empresarial e estudantes das ramas de dereito, empresa e tecnoloxía.
A formación conta con financiamento do Instituto Nacional de Ciberseguridad (INCIBE) e da Unión Europea. Ademais, colaboran na iniciativa a Deputación de Pontevedra, a Xunta de Galicia, o Concello de Pontevedra e a empresa ENCE, entre outras organizacións do ámbito tecnolóxico.