O Gafos 've a luz' en Campolongo

As obras de renaturalización do Gafos avanzan ao ritmo previsto e sen contratempos. Así o destacou este mércores o alcalde de Pontevedra, Miguel Anxo Fernández Lores, que realizou a súa primeira visita a esta ambiciosa actuación.

"Vai ser unha obra marabillosa para Pontevedra", sinalou Fernández Lores, que celebrou que este 'destape' do río en Campolongo, entre Alcalde Hevia e Xeneral Rubín, "vai devolverlle a vida ao río" e será valorada "positivamente" por toda a cidadanía.

Os traballos, até agora, concentráronse na zona situada entre o CEIP Campolongo e a escola infantil Crespo Rivas, xa que o obxectivo é que os accesos a ambos os centros educativos estean liberados en setembro.

Esta primeira fase, indicou o alcalde, é a máis "escura e confusa", xa que apenas teñen visibilidade. Están a centrarse no desvío do saneamento do río e na preparación dos carreiros provisionais para os colexios.

Neste sentido, xa comezou a reposición do saneamento na marxe esquerda, á altura da escola infantil, e estase executando a zapata da pasarela peonil máis grande do proxecto, que contará con doce metros de ancho.

Esta é a zona "máis crítica" para executar estes traballos, segundo explicou un dos seus directores, Mateo Villaverde, "pola falta de espazo que temos" para as escavacións e as contencións de terras que se deben facer.

Ademais, prepárase un acceso á piscina e ao colexio que non estaba inicialmente incluído no ámbito do proxecto, para que a zona quede habilitada para o regreso ás aulas.

A previsión establece que o levantamento das tapas de formigón da canle comezará durante este mes de xullo neste mesmo tramo para despois continuar río arriba.

Paralelamente, a finais de mes iniciarase o traslado de parte dos xogos do parque infantil de Campolongo, como estaba previsto no proxecto inicial.

Os aparellos destinados aos nenos de maior idade recolocaranse máis preto da piscina e serán reparados e homologados para estar operativos en setembro, mentres que a zona infantil para os máis pequenos manterase na localización actual.

O proxecto de renaturalización, adxudicado á UTE entre EC Casas e COVSA, por 4,2 millóns de euros e un prazo de execución de doce meses, actúa sobre unha superficie de 22.000 metros cadrados e unha lonxitude de 486,40 metros lineais de río.