Toda a zona do porto deportivo de Sanxenxo contará con conexión wifi gratuíta o próximo verán. Así o anunciou o Concello de Sanxenxo.
En concreto, colocaranse once dispositivos de acceso, nove exteriores que cubrirán a balsa de auga do porto deportivo, e dous interiores, para dar cobertura á Sala Nauta e a capitanía.
A instalación deste servizo con fibra óptica terá un custo total de 19.811 euros, dos que 15.000 serán sufragados con fondos europeos, a través do programa Wifi4EU; e 4.811 serán achegados por Nauta.
Un dos receptores exteriores instalarase no exterior do aparcadoiro de Nauta en dirección ao paseo de Silgar coa intención de que o sinal poida alcanzar ao areal e parte do paseo.
A empresa encargada da instalación do sistema, que está dentro da listaxe de firmas que esixe a subvención europea, é Telefónica Movistar.
O Concello de Sanxenxo encargarase do mantemento e as conexións.
A iniciativa Wifi4EU promove o libre acceso dos cidadáns á conectividade wifi en espazos públicos como parques, prazas, edificios oficiais, bibliotecas, centros de saúde e museos de municipios de toda Europa.