HerbaMeiga reabriu no centro histórico de Pontevedra despois de iniciar a súa andaina na Rúa Real a finais do ano 2020.
Agora, o seu dono, Xenxo Brais Escalante, decidiu trasladar a tenda ao espazo que durante décadas ocupou a histórica Librería Cao (Rúa Sarmiento 10).
Converteuse nun lugar vinculado ao benestar e aos produtos derivados do cannabis legal.
A idea deste traslado, explicou Escalante, "foi un pouco, primeiro por necesidade, porque o sitio onde estabamos era incómodo polo estado dos edificios da zona vella e, segundo, porque a tenda se nos estaba quedando pequena".
A oportunidade xurdiu ao ver o anuncio no escaparate do local, "falei co mozo e, como non podía ser dedicado a hostalaría e ninguén o estaba collendo, decidimos dar o paso", relata.
Este traslado, ademais de supor unha mellora en espazo e visibilidade, é unha aposta para seguir dinamizando o centro da Boa Vila. Desde HerbaMeiga destacan que se trata "dunha oportunidade para seguir crecendo sen abandonar a zona vella".
Este progreso débese en parte a que o sector do CBD foi gañando terreo na cidade.
"A demanda de CBD aumentou. De feito, agora somos tres tendas as que estamos en Pontevedra", apunta Escalante.
Segundo a súa experiencia, parte dese crecemento responde a un cambio nos hábitos de consumo porque "moita xente consumía cannabis buscando sobre todo temas de ansiedade ou para durmir mellor, pero o CBD dáche eses efectos sen colocarte".
O perfil do cliente tamén foi evolucionado. "A media de idade na miña tenda é alta, a trintena é o grupo forte da miña clientela", sinala, aínda que recoñece que cada vez se diversifica máis e "agora tamén vén xente maior, xente nova...".
A pesar deste avance, o estigma segue presente na sociedade. "Hai moitísimos", responde ao ser preguntado polos prexuízos.
Ademais, critica especialmente as limitacións normativas que prohiben a promoción do CBD e os seus beneficios, "obrigándonos a non dicir a verdade sobre un produto que é legal en Europa".
No entanto, percibe que "cada vez se vai quitando máis ese estigma".
Con esta nova tenda, o propietario ampliou a oferta de produtos, incorporando artigos de autocultivo, ademais de flores, resinas, cosmética, alimentación de cáñamo e artigos especializados.
"Na outra tenda non nos cabía. Agora si que imos ter algo máis de autocultivo, máis terras, abonos e cousas máis especializadas", explica.
Ademais, esta nova localización está nunha zona de maior tránsito, especialmente en horarios de tarde e noite. É por iso que Escalante confía en que, ao haber tanto movemento, "a xente entre, aínda que sexa a esculcar".
A iso suma o impacto do turismo internacional coa chegada de moitos visitantes de países onde o consumo está máis normalizado e buscan unha alternativa aquí. "A alternativa somos nós", afirma.
Máis aló do consumo humano, desde HerbaMeiga destacan os beneficios destes produtos para os animais. "O CBD funciona bastante ben, sobre todo para problemas articulares ou de ansiedade. Por exemplo, os cans grandes poden padecer displasias de cadeiras ou problemas articulares, pero se lles vas dando CBD axúdaos moitísimo, senten menos dor e descansan mellor", explica.
No caso do seu gato, é un animal moi ansioso cando se mete no coche, pero antes de entrar dálle un par de pingas "e o CBD tranquilízao e dórmeo".
"O sistema endocanabinoide", explica, "é un sistema que temos todos os mamíferos, principalmente e encárgase de regular o corpo".
Regula o soño, o apetito, a dor, a resposta inmunitaria e o estado de ánimo mediante receptores celulares "e hai determinadas substancias que funcionan nel.
Os canabinoides é unha delas e o CBD axuda a que o sistema funcione mellor e regule mellor".
De cara ao futuro, Escalante espera manterse. "Teño que seguir, sen máis. O noso 'mirar moi a futuro' depende de sentenzas e cousas que van saíndo constantemente. Queremos ter seguridade xurídica e non ter problemas por vender un produto que é legal", conclúe.
Herbameiga abriu esta nova etapa o pasado 2 de maio con horario de luns a sábado de 10:30 a 14:00 e de 17:00 a 20:30 horas.
