Un home faleceu este sábado na praia do Bao, situada no municipio da Illa de Arousa, despois de presentar dificultades cando se atopaba na auga.
O suceso mobilizou un dispositivo de urxencia no que participaron equipos sanitarios, de rescate e de seguridade.
O centro de atención ás emerxencias 112 Galicia recibiu o aviso do incidente ás 13:20 horas a través da chamada dun particular.
O alertador informou de que unha persoa pedía auxilio mentres permanecía agarrada a unha boia na zona da ponte da Illa de Arousa.
A muller do afectado, segundo o 112 Galicia, tivo que entrar no mar para acudir na súa axuda e requiriu tamén asistencia desde a auga.
Varios cidadáns que se atopaban no lugar colaboraron para trasladar o bañista ata a beira do areal.
Unha vez en terra, o persoal do Servizo de Urxencias Sanitarias de Galicia-061 iniciou as manobras de reanimación cardiopulmonar para tratar de salvarlle a vida.
O operativo contou co desprazamento dun helicóptero medicalizado con base en Santiago de Compostela, que aterrou no aparcadoiro de caravanas do contorno, aínda que os profesionais sanitarios só puideron certificar o falecemento.
A sala do 112 Galicia coordinou a intervención e requiriu a presenza da Garda Civil, dos Bombeiros do Salnés, de Salvamento Marítimo e do Servizo de Gardacostas de Galicia.
Engade Pontevedra Viva como fonte preferida de Google de balde
Mantente informado coas últimas noticias de actualidade.