As forzas de seguridade de Vilagarcía de Arousa interviron nas últimas horas en tres casos de violencia contra as mulleres e nunha agresión a un axente portuario, nunha xornada que tamén rexistrou tres accidentes de tráfico e unha denuncia por malos tratos animais.
A intervención de maior gravidade ocorreu arredor das 22:30 horas deste venres. Un home de 27 anos e nacionalidade colombiana foi detido tras arrebatarlle o teléfono móbil á súa parella e, a continuación, tentar atropelala cun patinete eléctrico.
Os feitos producíronse en presenza dos fillos menores de idade da vítima e requiriron a actuación conxunta da Policía Local e a Policía Nacional.
Pouco antes, ás 22:15 horas, os mesmos corpos policiais arrestaron outro home duns 30 anos no paseo que une Vilagarcía e Carril por outra agresión machista na vía pública. O investigado foi trasladado aos calabozos da comisaría á espera de pasar a disposición xudicial.
Ademais, durante a noite se rexistraba unha terceira detención no paseo marítimo da Concha, motivada igualmente por unha agresión a unha muller por parte da súa parella.
AGRESIÓN NO PORTO
A actividade policial da noite incluíu o arresto dun cidadán que accedeu aos pantaláns onde se custodian as embarcacións do Servizo de Vixilancia Aduaneira.
Ao ser requirido por un policía portuario para que abandonase a instalación, o home propinoulle un golpe na cara e, posteriormente, proferiu insultos e ameazas de morte contra os axentes da Policía Local que acudiron a detelo.
Pola tarde, a condución de vehículos de mobilidade persoal xerou problemas de seguridade viaria, con tres accidentes de tráfico case simultáneos. Dous deles saldáronse con dúas persoas feridas leves, evacuadas en ambulancia ao Hospital do Salnés.
A Policía Local sinala que a maioría destes patinetes implicados en sinistros carecen de seguro obrigatorio, o que deriva en custos económicos por danos e asistencia sanitaria para os seus condutores.
Por último, os axentes abriron un expediente sancionador baixo a lei de benestar animal contra o propietario dun cabalo.
O animal foi localizado nunha leira atado ao sol, sen auga e sen posibilidade de acceder a zonas de sombra durante as horas de altas temperaturas. A policía identificou o dono mediante o chip do equino e avalía a apertura de dilixencias penais.