A Policía Local de Marín impuxo durante o primeiro trimestre do ano preto de 90 multas por detectar un mal uso das zonas de aparcamento limitadas a dúas horas dentro do centro urbano, a bautizada como Zona 2H.
Así o deu a coñecer o Concello valorando a aplicación dunha medida que busca favorecer a rotación dos vehículos para facilitar a realización de compras ou recados concretos.
Segundo os datos solicitados nun informe da policía municipal, a gran maioría de infraccións son cometidas por persoas residentes no propio centro urbano.
Desde o goberno local adiantan que se seguirán realizando controis periódicos para garantir o bo uso da Zona 2H.
Actualmente esta zona de estacionamento gratuíta pero limitada no tempo está a aplicarse nunha zona próxima á Praza da Abastos, no Centro de Saúde, na Rúa Méndez Núñez, en Jaime Janer, Rúa da Ponte e na Avenida de Ourense.