Un incendio rexistrado na mañá deste venres mobilizou os Bombeiros do Morrazo ata a Escola Naval Militar de Marín.
O lume comezou no tellado dun edificio en obras no Peirao de Torpedos destas instalacións militares, en concreto, no coñecido como Pañol Histórico, o museo da Escola.
Segundo a información facilitada polo 112 Galicia, desde a Escola alertáronos do ocorrido ás 9.33 horas deste venres indicando que xa tiñan medios propios apagando o lume.
De todos os xeitos, a Escola Naval pediu reforzos e o 112 mobilizou os profesionais do parque comarcal do Morrazo.
Desde o 112 indicaron que os bombeiros lles trasladaron que o lume quedou controlado pouco despois e procedeuse a revisar a estrutura de modo preventivo.
Dado que era unha zona en obras, estas comprobacións resultaban necesarias para analizar o impacto do lume. Finalmente, descartouse o impacto.