Ata doce camiños rurais, cunha extensión global que supera os 3.000 metros cadrados, serán mellorados coas actuacións previstas nunha nova fase do plan de pavimentacións que impulsa o goberno municipal de Marín.
En todas estas obras, o Concello investirá algo máis de 250.000 euros, segundo avanzou o responsable de Rural, Pablo Novas.
O novo paquete de actuacións incluirá obras en O Carregal, Pena e Caeiro, en San Xulián; O Cruceiro do Vento, en Mogor; Castro e A Brea-O Barrio, en Seixo; Ameal-Oubiña e Sobreiras, no Campo; O Pereiro e O Pozo, en Santomé de Piñeiro; e Loira e Saíde, en Ardán.
Todos estes camiños, explicou o edil marinense, verán rehabilitado o seu firme, mellorando a seguridade viaria da veciñanza que, en moitos casos, ten nestes camiños a única vía de acceso ás súas vivendas e parcelas privadas.
Con este investimento, o Concello busca "seguir mellorando o noso rural, apostando por el e planificando a súa mellora paulatina", para ofrecer os mesmos servizos que no casco urbano.