Máquinas de varrido e limpadoras de auga a presión traballarán durante a madrugada deste xoves 11 de abril nas beirarrúas, cunetas e calzada das rúas Otero Pedrayo e Entrevías de Pontevedra.
Trátase dunha nova intervención intensiva programada pola concellería de Limpeza, que dirixe Xaquín Moreda.
Desde o Concello de Pontevedra alertan de que a zona de estacionamento estará valada durante a semana para prohibir o aparcamento durante as horas anteriores á execución dos traballos.
Os vehículos que permanezan estacionados serán retirados polo guindastre municipal, alertan desde a concellería, que solicita a colaboración veciñal e tamén dos condutores para garantir un bo resultado nesta intervención.