A conta atrás para a Semana Santa xa comezou en Pontevedra. A Xunta Coordinadora presentou este sábado, nun acto público celebrado na Praza da Peregrina, o programa das actividades previstas nos días previos a que as procesións tomen as rúas do centro histórico.
O presidente do colectivo, Ramón Peón, anunciou que o pregoeiro deste ano será José Luís Ageitos Míguez, quen pronunciará o seu discurso o próximo 11 de marzo, ás 20.00 horas, no Teatro Principal, marcando oficialmente o inicio dunha das celebracións máis arraigadas da cidade.
A programación continuará o 14 de marzo, ás 18.00 horas, coa tradicional Misa da Xunta Coordinadora na Casa do Inmaculado Corazón de María, unha cita que este ano adquire un significado especial ao coincidir co centenario da aparición da Virxe a Sor Lucía.
A música procesional será a protagonista o 21 de marzo, ás 20.00 horas, no Teatro Principal de Pontevedra, onde a Banda de Música de Pontevedra ofrecerá un concerto de marchas que anticipará a solemnidade dos días grandes.
O Venres de Dores, o 27 de marzo, chegará a primeira procesión, con saída desde a igrexa de San Xosé até a Peregrina, nun percorrido que volverá encher de recollemento e tradición as rúas pontevedresas.
Apenas un día despois, o 28 de marzo, a praza da Ferrería acollerá a segunda edición do Certame de Bandas Confrades, coa participación de cinco formacións locais e a banda Vides Novas de Poio como convidada.
A presentación deste acto, conducida pola xornalista Belén Hermida, contou coa intervención do vicepresidente da Deputación, Rafa Domínguez, e da conselleira de Vivenda e Planificación de Infraestruturas, María Martínez Allegue. Esta última puxo en valor o traballo da Xunta Coordinadora para manter viva unha tradición con máis de seis séculos de historia.
A Semana Santa pontevedresa, integrada por sete confrarías, dez procesións e 28 pasos que percorren o centro histórico, é —subliñou Allegue— unha das manifestacións máis consolidadas da Boa Vila.
Máis dun milleiro de confrades fan posible cada ano unha celebración que, ademais da súa dimensión relixiosa, dinamiza a vida cultural, social e turística da cidade e realza o singular patrimonio urbano que a acolle.
A xornada incluíu así mesmo a entrega de premios do certame fotográfico ‘Retrato da nosa Semana Santa’. O primeiro galardón foi para Eliana González pola súa obra Madeiro Santo, que será a imaxe do cartel oficial. O segundo recoñecemento obtívoo Laureano Gallego con Cristo en Santa María, fotografía seleccionada para anunciar o cartel dos actos preparatorios.