O Concello de Caldas de Reis saca a licitación os traballos de mantemento dos parques e xardíns do municipio.
Trátase dun contrato que conta cun orzamento de 50.000 euros, sendo prorrogable até un máximo de catro anos.
Son catro as empresas que mostraron interese en facerse co servizo ao peche do prazo establecido, e a adxudicación farase oficial nos próximos días, segundo avanza o goberno local.
"O noso obxectivo é que Caldas luza como merece e iso é algo que queda garantido grazas a este contrato", asegura o alcalde, Jacobo Pérez.
Coa idea de axilizar as tarefas o máximo posible, o Concello avanza a intención de promover un contrato temporal para non atrasar a posta a piques das zonas verdes.
"Deste xeito, conseguimos que Caldas de Reis estea nas mellores condicións en pleno verán", explica o rexedor.
As primeiras actuacións levaron xa a cabo na zona próxima á igrexa e diante do asilo, cuns traballos que se centran na limpeza nas zonas de céspede e flores e espazos verdes, ademais da plantación de especies típicas da tempada.
"Non utilizamos o rego convencional por unha cuestión de responsabilidade. Atopámonos en pleno verán e a nosa prioridade é o subministro a vivendas", engadiu Pérez afirmando que "moitos destes espazos son puntos de encontro e lugares de referencia do noso municipio, polo que para nós é unha prioridade garantir o seu mellor estado".