O empresario Luciano Martínez Pérez, propietario do Hotel Galicia Palace, faleceu este domingo aos 86 anos de idade. Era ademais o dono doutro dos establecementos hostaleiros de referencia na provincia, o Hotel & Talaso Louxo La Toja, no Grove.
Na Lama, municipio no que naceu o 10 de novembro de 1935, o seu falecemento foi tamén moi sentido. Aínda que se mudou a Pontevedra sendo apenas un neno, mantiña fortes vínculos co seu concello natal. Entre outras cousas, foi membro fundador do seu equipo de fútbol.
Luciano Martínez, como moitos outros homes da súa xeración, emigrou a América e probou sorte en Brasil e en México antes de regresar a Galicia e impulsar estes dous hoteis.
Estaba casado con Ofir Carballal, que faleceu hai apenas sete meses, e tiña tres fillos.
Desde a SD A Lama uníronse ás mostras de condolencia pola perda do empresario, que xunto co seu irmán foi o artífice da ampliación do campo de fútbol.
Non foron os únicos que este luns tiveron un recordo para Luciano Martínez. Tamén a SD Teucro quixo despedirse do que foi durante anos patrocinador do club.
Lamentamos o pasamento de D. Luciano Martinez, propietario do Hotel Galicia Palace patrocinador da SDTeucro durante moitos anos.
— Sociedad Deportiva Teucro (@sdteucro) August 22, 2022
Queremos facer chegar todo o noso cariño a familia. pic.twitter.com/W2wmVC0lrz
O seu funeral celebrouse esta mañá na igrexa de San Salvador, na Lama. Posteriormente foi enterrado no cemiterio municipal desta localidade pontevedresa.