O Concello de Pontevedra trasladou á Consellería de Infraestruturas, Planificación e Vivenda da Xunta de Galicia o compromiso de colaborar de xeito activo na mellora da estrada PO-224.
Tamén se ofrece na procura de alternativas á continuidade da A-57, despois de que se rexeitaran as dúas fases previstas no acordo plenario adoptado por unanimidade o luns 17.
O alcalde, Miguel Anxo Fernández Lores, enviou unha carta á conselleira María Martínez Allegue, tal e como se acordara coa titular de Infraestruturas nunha conversa previa ao pleno, na que lle ofrece a total disposición do Concello para manter reunións, tanto políticas como técnicas, coa finalidade de elaborar propostas viables e adaptadas ao territorio.
O acordo municipal recolle catro puntos fundamentais:
-
O rexeitamento da circunvalación nos tramos A Ermida-Pilarteiros e Pilarteiros-Barro
-
Proposta de redirixir os fondos previstos para estes proxectos á continuación da estrada A-57 cara ao Confurco, a A-52 e Portugal.
-
Demanda dunha conexión directa, por parte do goberno do Estado, con Vigo desde o actual trazado feito entre Vilaboa e Pilarteiros, xa que a conexión Vilaboa-Vigo pola autoestrada actualmente non existe.
-
Mellora substancial da PO-224, estrada de titularidade autonómica, sen que implique ampliación do número de carrís.
Fernández Lores destacou a necesidade urxente de actuar na PO-224, "que leva 40 ou 50 anos sen melloras importantes" e presenta numerosas curvas e puntos críticos, como a ponte sobre o Lérez, que dificulta o cruzamento de vehículos.
O obxectivo é que os veciños do leste do municipio, especialmente entre Bora e Barro, poidan dirixirse cara Vilagarcía ou o Salnés sen ter que entrar na cidade de Pontevedra, evitando así maior tráfico e molestias aos núcleos rurais.
O rexedor tamén puxo en valor a experiencia e capacidade técnica do Concello para propoñer alternativas viarias que non impacten negativamente no territorio nin na infraestrutura existente, resaltando a importancia de manter unha relación de lealdade institucional coa Xunta.
A conselleira, segundo o alcalde, amosou unha boa disposición inicial para estudar as melloras propostas, comprometéndose asdúas partes a avanzar con dilixencia nestas solucións, coa finalidade de optimizar as conexións viarias e responder ás necesidades da veciñanza.