O vindeiro xoves día 7 de xullo o alcalde de Pontevedra, Miguel Anxo Fernández presentará no Museo Reina Sofía o congreso de urbanismo e recuperación do espazo público Placemaking Week Europe que a Boa Vila acollerá a partir do 27 de setembro.
Trátase dun evento que reunirá a uns 400 expertos, na súa maior parte europeos e un 20 % procedentes de Estados Unidos e África.
Nesa presentación en Madrid, Lores estará acompañado pola concelleira de Promoción da cidade, Anabel Gulías; o director da Fundación Placemaking Europe, Ramón Marrades; o vicepresidente da Deputación da Coruña, Xosé Regueira. O acto será presentado pola xornalista Ana Pardo de Vera.
Para Pontevedra, a Placemaking Week, segundo dixo Anabel Gulías, "é un evento que debe ter unha relevancia a nivel galego e entendiamos que unha forma de publicitalo era trasladándonos a Madrid" elixindo este museo "emblemático" para "atraer a cantas máis persoas á cidade" para asistir a este encontro internacional.
Ademais de avanzar na referencialidad internacional de Pontevedra, a cita de setembro atraerá a numerosos visitantes e a persoas expertas no espazo público, polo que supón todo un reto para o Concello de Pontevedra, que xa traballa na preparación. Aquí enmárcase o encontro celebrado este venres cos patrocinadores (Efímera, Edigal, Setga, Cristalería, CIFP Carlos Oroza, Viaqua, Mancomunidade do Salnés e Asociación de empresas Pont Up Store, Deleite e a Asocaición de Hostaleiros de Pontevedra).
A intención de todos eles é "converter a Placemaking Week nun escaparate do talento empresarial da cidade" e tamén "un exemplo de políticas públicas para facer cidades mellores", segundo incidiu Anabel Gulías.
Engade Pontevedra Viva como fonte preferida de Google de balde
Mantente informado coas últimas noticias de actualidade.