O alcalde de Pontevedra comprometeuse, ante os membros do comité de empresa de Tafisa e representantes dos tres principais sindicatos, a solicitar unha reunión coa dirección da fábrica situada en Ponte Caldelas para trasladarlles a súa preocupación ante o peche anunciado e a perda de 60 postos de traballo.
Miguel Anxo Fernández Lores referiuse a que o contacto coa propietaria da empresa, o grupo Sonae, finalizou no ano 2003 coa recualificación dos terreos que a factoría ocupaba en Pontevedra, nas beiras do Lérez. Pero engadiu que iniciará "unha rolda de contactos para ver se podemos botar unha man, para que o comité de empresa poida ter reunións do máis alto nivel coa máis alta dirección de Sonae para que lle expliquen ou rectifique a posición que teñen".
José Manuel Moledo, presidente do comité de empresa, volveu manter a súa discrepancia coas cifras de perdas que manexa a dirección da empresa e que se sitúan en 9,7 millóns de euros. Os traballadores insisten en que dende que se produciu un cambio na dirección da fábrica, hai once meses, se detectou unha mellora e as cifras foron positivas ao longo deste ano.
Este venres 23, os traballadores de Tafisa reuniranse co presidente da Deputación, Rafael Louzán, dentro do calendario de entrevistas que decidiron levar a cabo antes de que o 27 de maio inicien a folga indefinida na fábrica.