A Deputación de Pontevedra acolleu este martes o último pleno da actual Corporación á espera de que o próximo venres se celebre a sesión plenaria constitutiva na que os novos deputados tomarán posesión dos seus cargos. En apenas un minuto liquidouse este acto formal de peche de actas.
A anécdota da xornada foi a ausencia do presidente en funcións, Rafael Louzán quen se encontraba en Madrid como máximo responsable da Federación galega de fútbol participando na asemblea xeral da española.
Cumprido o trámite e finalizado o pleno os voceiros de cada un dos grupos fixeron un breve discurso agradecendo o traballo desenvolvido nos últimos anos, desexando "sorte" a aqueles compañeiros que non formarán parte da nova corporación.
Estes últimos fixéronse unha foto de familia como recordo antes de abandonar o Pazo provincial.
FUTURO GOBERNO BIPARTITO
O voceiro socialista na Deputación e Secretario provincial do PSdeG, Santos Héctor, destacou o "bo e inmellorable clima" no que se desenvolven as conversacións abertas co BNG de cara a formar o futuro goberno na Administración Provincial.
Santos Héctor celebrou a "coincidencia" de ambas as dúas formacións para que a Deputación sexa "máis transparente e máis pegada á realidade dos veciños e na confianza dun goberno único formado por dúas forzas políticas".
Este "bo clima", vai permitir que "no día de mañá ou pasado poidamos asinar un acordo programático de goberno", concluíu o Secretario provincial socialista.
Igualmente o voceiro nacionalista, César Mosquera, apuntou que o acordo está "moi avanzado" e quixo destacar o feito de que "por primeira vez esta casa vai ter un programa de goberno".
NON AO "LOCALISMO" DE VIGO
O voceiro do grupo provincial do Partido Popular, José Manuel Figueroa, trasladou o seu desexo de que a futura presidenta da Deputación, a socialista viguesa Carmela Silva "trate a todo o mundo por igual" e subliñou que "aquí non ten que haber o localismo de Vigo, cometería un erro tremendo", advertiu.
José Manuel Figueroa recordou que a Deputación "traballa para unha provincia de concellos pequenos" polo que entende que a acción do novo goberno ten que estar dirixida a resolver os problemas da poboación destes municipios, "espero que non se equivoque", indicou.
Finalmente desexo que a política que aplique o novo goberno "esperemos que non sexa unha fotocopia do que fan noutros concellos, como o de Vigo, sería un erro tremendo e volveriamos para atrás", insistiu.