A Deputación de Pontevedra deu un paso firme cara a un futuro máis verde e sostible. Así o anunciou o seu presidente, Luís López, durante o primeiro Congreso de Comunidades Enerxéticas celebrado este mércores no viveiro de empresas do polígono industrial de Barro.
Alí, López puxo en valor o forte impulso que desde a Deputación está a darse aos proxectos de eficiencia enerxética e enerxías renovables. En total, un investimento de 8,5 millóns de euros en só dous anos para fomentar sistemas sostibles de produción e consumo de enerxía en municipios, comunidades e sedes de diferentes colectivos de toda a provincia.
Durante a inauguración do evento, o presidente lembrou a creación, fai menos de dous anos, da Oficina de Transformación Comunitaria, enmarcada no programa +Renovables, unha iniciativa que xa está a dar grandes resultados. "A produción e o consumo de enerxía tamén forman parte da nosa aposta transversal pola sustentabilidade", subliñou López.
Unha das grandes protagonistas do congreso foi a figura das comunidades enerxéticas. A día de hoxe, xa se constituíu unha comunidade enerxética na provincia, e hai outras seis en camiño, grazas ao asesoramento e apoio desta Oficina de Transformación Comunitaria.
Desde a súa posta en marcha en febreiro de 2024, o proxecto levou a cabo 57 reunións informativas noutros tantos municipios, 14 asesoramentos a entidades interesadas en formar unha comunidade enerxética e 40 estudos enerxéticos: 36 en municipios e 4 para colectivos concretos como as Comunidades de Montes de Anceu e Nespereira, ou a Residencia da 3ª Idade de San Pedro de Crecente.
E isto non se detén aquí. Xa hai previstas 18 novas charlas en municipios, 2 encontros con grupos promotores, 23 estudos enerxéticos por aprobar, 14 novos asesoramentos e 8 formacións en distintas comarcas.
López tamén destacou que, ademais do traballo da Oficina, a Deputación está a executar diversos programas dentro do plan +Renovables, que suman un total de 8,5 millóns de euros. Entre eles, destacan 4,2 millóns de euros para instalar plantas fotovoltaicas en 38 concellos, cunha axuda europea de 2,4 millóns. Outros 2,7 millóns para renovar a iluminación pública en 18 municipios.
A isto sumón 160.000 euros para instalacións fotovoltaicas en cinco concellos, 410.000 euros en instalacións xeotérmicas en dúas localidades e máis de 120.000 euros para implantar sistemas de aerotermia sostible en municipios como Catoira e As Neves.
Durante o congreso, os asistentes puideron coñecer de primeira man como funciona a Oficina de Transformación Comunitaria, o potencial enerxético da provincia e exemplos reais de comunidades enerxéticas que xa están a funcionar. Tamén se falou sobre innovación tecnolóxica, políticas públicas e o impacto económico destas iniciativas. Ademais, organizáronse dous talleres sobre emprendimiento verde e participación cidadá.
Luís López pechou a súa intervención agradecendo a todas as persoas, colectivos e administracións que están a colaborar con este proxecto común.
O presidente expresou o seu agradecemento a todas as persoas, colectivos e administracións que se están sumando a esta Oficina de Transformación Comunitaria e desexou que no próximo congreso as cifras e experiencias relacionadas coas comunidades enerxéticas "sexan aínda máis positivas", concluíu con optimismo.