O Consello de Administración da Autoridade Portuaria aprobou este xoves a autorización para a prestación do servizo comercial de consignación de buques no Porto de Marín á empresa COMARSA (Consignacións e Operacións Marítimas S.A).
Segundo establece a lexislación portuaria, esta autorización préstase por un prazo de cinco anos, prorrogable anualmente de maneira automática salvo renuncia expresa da empresa.
Desde a súa fundación no ano 2000 como axencia consignataria de buques no porto de Vigo, COMARSA ofrece un servizo integral en todo o relacionado coa loxística de mercadoría e buques.
Están especializados no tráfico das pequenas e medianas empresas, especialmente no sector dos perecedoiros e conxelados. Son axentes exclusivos de MACS (Maritime Carrier Shipping) para o noroeste de España. Líderes no tráfcio con África do Sur desde Vigo, cunha frecuencia de 11 días, a súa frota de buques 'multi-purpose' permite manexar contedores refrixerados e secos, project cargo, ro-ro, cargas pesadas, carga xeral, graneis secos e líquidos.
Na súa reunión deste xoves, o Consello de Administración da Autoridade Portuaria tamén aprobou outorgar unha nova licenza para a prestación do servizo de manipulación de mercadorías para pesca conxelada a granel e paletizada á empresa Estinorte (Estiba e Desestiba do Noroeste S.L.).
Esta empresa, con sede social en Moaña, naceu en 1990, e desenvolve a actividade de manipulación de mercadorías conxeladas desde o buque ata a planta de clasificación realizando distintos procesos de forma integral ata a saída ao cliente. Traballan nas instalacións frigoríficas da Ría de Vigo e do Porto de Marín.
Por outra banda, o Consello aprobou o nomeamento como práctico habilitado definitivamente de Antonio Ortega Sebastián, quen superou as probas convocadas pola Dirección Xeral da Mariña Mercante para exercer este labor de practicaje no Porto de Marín.
Engade Pontevedra Viva como fonte preferida de Google de balde
Mantente informado coas últimas noticias de actualidade.