Miguel Anxo Fernández Lores, alcalde de Pontevedra, acompañado por Alberto Oubiña, concelleiro coordinador do Rural, achegábanse este mércores pola parroquia de Lourizán para comprobar o inicio das obras de mellora da Rúa Liñares, un proxecto que inicialmente afectaba a Rial, Rorís e O Meán, pero que se paralizou coa quebra da empresa Nexia e foi necesario volver sacar o contrato a licitación coa inclusión desta vía que une un núcleo urbano con dous puntos da antigüa estrada de Marín.
O alcalde destacou que esta actuación que se eleva ao medio millón de euros permitirá a ampliación do ancho grazas á cesión veciñal de seis parcelas, permitindo que este acceso ofreza un ancho de seis metros e medio. Este proxecto inclúese nun máis amplo de 3 millóns de euros que xa se foi executando en Lérez, A Peralba, Campañó e en Mourente.
A obra na Rúa Liñares contempla a substitución das canalizacións de pluviais, saneamento e abastecemento. Fernández Lores destacou este investimento no rural co obxectivo de que a veciñanza teña os mesmos servizos e condicións de vida que no centro urbano. Alberto Oubiña sinalou que os traballos permanecen pendentes dun cambio de lugar de postes de Telefónica, que a empresa aínda non realizou.
O rexedor lembrou que ao longo deste mandato investíronse máis de 100 millóns de euros no rural pontevedrés coa renovación e instalación de servizos de saneamento, rehabilitación de firmes, nova iluminación LED, equipamentos deportivos e culturais e melloras na rede de abastecemento.