Concluíu o primeiro plan de acondicionamento de pistas que o goberno local de Moraña realiza neste mandato co arranxo integral dos accesos ao lugar da Pallota e A Fontaíña, en Rebón.
O investimento ascende a 35.000 euros co financiamento do Plan Marco de mellora de camiños da Xunta de Galicia.
Trátase dun primeiro paso dentro das previsións anunciadas polo alcalde Sito Gómez, que ten previsto realizar un programa integral de acondicionamento da rede de estradas municipal ata 2027. A este proxecto destinaranse máis de dous millóns de euros.
Tamén ten previsto mellorar os locais sociais no rural e a iluminación pública das parroquias, ademais desta intervención nas pistas para facilitar a mobilidade.
En Rebón, grazas a esta mellora, corenta residentes benefícianse da limpeza de beiravías, fresado en zonas que presentaban un firme deteriorado e reasfaltado dos accesos na estrada entre a EP-0503 Mane-Rebón e a entrada ao núcleo da Pallota e tamén na vía de acceso ata o lugar da Fontaíña, nun espazo con parcelas de uso agrícola e gandeiro, monte forestal e zonas residenciais.