Vilagarcía celebrará este venres 1 de maio unha nova edición da súa tradicional Festa dos Maios.
Serán cincuenta e cinco composicións florais as que se exporán ao longo de toda a xornada na Praza da II República.
O número de participantes deste ano elévase aos 25, catorce individuais e once colectivos. En caso de chuvia, os actos trasladaríanse á Praza da Peixería.
Entre as cinco modalidades de maios que existen, os máis numerosos serán os de tipo caixa (15 traballos), seguidos dos cónicos (14) e os artísticos (14). A mostra completarase con 7 cruces e 5 barcos.
O festival abrirá ás 11:15 da mañá coa apertura da exhibición, que se poderá visitar ata as 20:30 horas. Ás 11:30 dará comezo a actuación dos grupos coa interpretación das letras elaboradas por eles mesmos.
Principalmente serán comunidades educativas: as dos colexios Rosalía de Castro e de Rubiáns; e as das ANPAs Doctor Fleming (Anexo A Lomba), Xunqueira (A Lomba), Alonga (Arealonga), Escardia, San Martiño (Vilaxoán) e a do Centro de Educación Especial.
Polo escenario tamén pasarán os membros da asociación sociocultural e recreativa Contra Vento e Marea, da Laxe, os usuarios da Residencia Divina Pastora e O Coro das Maias.
A Festa dos Maios de Vilagarcía non ten carácter competitivo polo que todos os participantes serán agasallados con rosca e cunha achega económica en función do número de membros, da modalidade de maio presentado e de se levan coplas.
As contías oscilan entre os 30 e os 150 euros.