A partir do próximo luns 20 de novembro, a Policía Local de Sanxenxo activará unha campaña especial de control de tráfico e de sensibilización en seguridade viaria en todo o municipio.
Esta acción, segundo adianta o goberno municipal, manterase durante a ponte de decembro e as festas do Nadal, coincidindo cun incremento nos desprazamentos en vehículos e tamén cun maior consumo de alcol nas comidas e ceas.
O obxectivo desta medida é reducir os accidentes de tráfico no municipio e obrigar a cumprimento das normas básicas de seguridade viaria como respectar os límites de velocidade establecidos ou facer uso do cinto de seguridade e do casco, no caso das motocicletas.
A campaña arrancará cos controis do servizo de transporte público como os autobuses escolares e os taxis. A Policía Local vixiará especialmente que se circula á velocidade permitida e que non se fai uso do teléfono móbil ou outros aparellos que supoñan distracción.
Tamén se realizarán controis de alcol e outras drogas entre os condutores.
Ademais, debido á importancia que ten o cinto de seguridade en caso de accidente, prestarase especial atención ao o seu uso naqueles autobuses escolares que os leven instalados; ou ás condicións técnicas ou á documentación dos vehículos.
Entre os días 27 de novembro e 3 de decembro, pola súa banda, os axentes prestará especial atención aos sistemas de retención e cintos de seguridade en turismos.
Durante as festas do Nadal, a Policía Local incrementará os operativos de control de velocidade e alcoholemias. As estatísticas reflicten que o alcol segue sendo a substancia máis consumida polos condutores falecidos, seguida da cocaína, cánnabis e psicofármacos.