Mango, unha das firmas téxtiles máis importantes do país, aposta en firme por Pontevedra. Xa se coñecen todos os detalles do seu novo establecemento na cidade, que estará situado no corazón da 'milla de ouro' pontevedresa.
Mango Teen, a liña de moda xuvenil da compañía, ultima o seu desembarco en Benito Corbal e xa presentou o proxecto para unir cinco locais comerciais nunha única tenda que ocupará 1.048 metros cadrados, dos cales útiles serán 863.
Así, esta nova tenda iría desde o Gran Garaxe -onde Mango ten a súa tenda máis emblemática- até Daniel de la Sota, integrando os antigos establecementos de Sy&Co, Merchi Neto, Foot on Mars e outros dous locais xa baleiras desde hai un tempo.
Ademais, a nova tenda de Mango utilizará a antiga discoteca Daniel, que posteriormente foi coñecida como Lelé de Noite, como almacén, e a súa saída de emerxencia por Benito Corbal será a entrada ao establecemento.
A planta baixa, que estará destinada á venda, serán 220 metros cadrados de tenda, aos que se sumarán outros 70 de escaleiras, baños, ocos do ascensor e corredores.
O soto, pola súa banda, terá un almacén duns 200 metros cadrados e dependencias para o persoal, mentres que na entreplanta, con outros 283 metros cadrados útiles, irán as máquinas de climatización e ventilación.
O edil responsable da área municipal de urbanismo, Alberto Oubiña, indicou que este proxecto suporá unha "transformación radical" de todo este ámbito urbano, xa que asegurou que esta operación "excede dunha simple reforma".
A compañía prevé investir máis de 523.000 euros no acondicionamento desta nova tenda, que terá espazos diáfanos e empregará materiais ambientalmente sostibles, entre eles falsos teitos elaborados con roupa reciclada.
Mango obtivo xa o visto e prace de Patrimonio da Xunta para esta operación que, entre outras particularidades, incluirá pintura que absorbe o CO2, carpintaría con fibra de carbono ou exteriores acabados en mate para evitar brillos.
Os locais que ocupará Mango Teen, ademais de unirse polo interior, verán unificado o seu exterior, sobre todo en materia de accesibilidade, xa que se retirarán todos os chanzos e quedarán a cota cero coa rúa.
A tenda respectará a liña estética dos establecementos desta firma, caracterizados polo uso de cores vivas e por mergullar aos seus clientes nun universo experiencial e interactivo, segundo destaca a propia compañía.
Os técnicos municipais estudarán agora o proxecto pero, se todo está correcto, ao presentalo a través dunha comunicación previa, "en quince días poderían estar a traballar", avanzou o responsable do urbanismo en Pontevedra.
Mango estima que as obras terán unha duración de dous meses
"Non é unha startup que empeza de cero senón unha empresa consolidada que ve en Pontevedra unha oportunidade de escalada", subliñou Oubiña, que celebra que Mango demostre que o seu modelo "funciona" na cidade.
Ao mesmo tempo, o edil defendeu que esta operación tamén sirva para mostrar que apostar por Pontevedra "é un valor seguro" porque, ao seu xuízo, "cando coidas a cidade as empresas responden con confianza e investimentos potentes".
A forma de combater o "apocalipse retail" e o aumento das vendas por internet, segundo o concelleiro do BNG, é "facer cidade" e facelas máis habitables. Cando o fas, sentenciou, "as multinacionais responden e volven ás rúas porque hai vida".