Centos de persoas marchan baixo a chuvia en Pontevedra para apoiar a Palestina e a Flotilla Sumud Global

A chuvia non impediu que centos de persoas saísen á rúa en Pontevedra este sábado 30 de agosto, ás 20:00 horas, para participar na mobilización convocada polo Movemento Global a Gaza – Galiza.

Baixo o lema "Contra o xenocidio e en apoio á Flotilla Sumud Global", a marcha expresou a solidariedade da sociedade galega co pobo palestino.

A manifestación, que comezou na Praza do Hospital Provincial e avanzou ata a Subdelegación do Goberno, contou coa presenza de paraugas que desafiaron a intensa chuvia que caía na cidade.

Durante o percorrido, os participantes fixeron paradas diante de entidades e tendas como Zara, que os manifestantes consideran que colaboran co goberno de Israel.

Desde o Movemento Global a Gaza – Galiza denuncian que a comunidade internacional está a asistir "en directo a un xenocidio", con "vidas esnaquizadas, familias destruídas, hospitais e escolas bombardeadas, persoal sanitario e xornalistas asasinados".

A mobilización tamén serviu para apoiar a Flotilla Sumud Global, que partirá este domingo 31 de agosto desde distintos portos internacionais con ducias de barcos e tripulacións de 44 países.

O obxectivo común é romper o asedio ilegal imposto a Gaza por mar e entregar axuda humanitaria, ademais de facer "visíbel a solidariedade internacionalista coa Palestina".

Os convocantes criticaron a "complicidade de gobernos europeos e institucións internacionais, que manteñen relacións comerciais e militares co Estado de Israel mentres a infancia palestina é obxectivo do terror".

"Palestina resiste xeración tras xeración, con dignidade e orgullo, e a súa loita é tamén a nosa", sinalaron na lectura do seu manifesto.

O Movemento Global a Gaza – Galiza fixo un chamamento especial a manter a vixilancia no caso de que a flotilla sufra sabotaxes ou ataques durante a súa viaxe.

Os actos de solidariedade tamén se realizaron noutros puntos das Rías Baixas como Sanxenxo, A Illa de Arousa, Redondela ou Vigo.