Marea Pontevedra critica a "situación de deterioro" na que está o Pazo de Mariño Lobeira e denuncia os "perigos" que poden estar asociados á "situación de abandono" de varios edificios da rúa César Boente coa chegada do inverno. Sobre estas críticas o voceiro municipal, Luis Rei, realizou varias preguntas á concelleira de Urbanismo, Carme da Silva, e anuncia que "de non ter unha resposta clara, presentará unha moción ao respecto".
Marea asegura que se fai eco de novas protestas veciñais sobre o "insoportable estado de abandono" da rúa dende hai cinco anos e, dado o "acreditado deterioro" do Pazo de Mariño de Lobeira amosan a "preocupación compartida coa cidadanía" de que unha situación climatolóxica adversa poida facer que este edificio veña abaixo.
A agrupación recorda que esta situación xa foi denunciada reiteradamente nos últimos anos por diversos colectivos "sen que desde o equipo de goberno do Concello se concretasen medidas eficaces para a súa defensa e restauración". Marea entende que esta "débil actuación" por parte das diversas concellarías implicadas pon en evidencia o "sonoro fracaso" do actual Goberno municipal en materia de protección da riqueza monumental da cidade.
Entre outras cuestións, preguntáronlle a Carme da Silva se "é consciente o goberno municipal de que cada vez son máis numerosos os veciños que evitan o paso pola rúa César Boente" ou se non "non lle preocupa que o atractivo da zona monumental se vexa considerablemente minguado polo estado de absoluto abandono dos principais edificios desa rúa". Ademais, quere saber se hai previstas medidas para garantir a seguridade dos transeúntes e veciños ante a chegada dunha nova estación invernal, así como que informes técnicos se solicitaron e que actuacións hai xa en marcha para evitar o derrube do Pazo de Mariño de Lobeira e do edificio lindeiro.