A orquestra Panorama puxo este martes o broche de ouro ás festas do Carme de Marín, unhas celebracións multitudinarias que durante a última semana encheron a vila mariñeira e que no seu último día puxeron o listón aínda máis alto de cara o próximo ano.
Este martes, Día do Carme, foi o día grande dos festexos e Marín encheuse da mañá á noite. A xornada empezou por todo o acto coa entrega de reais despachos a 92 novos oficiais da Armada na Escola Naval Militar, coa presenza este ano do Rei Felipe VI, e continuou cunha completa programación que se prolongou ata ben entrada a madrugada.
A misa en honra á Virxe, a Ofrenda Floral e a procesión marítima pola Ría de Pontevedra marcaron as celebracións relixiosas da mañá e a tarde e, chegada a noite, o concerto da Orquestra Panorama encheu a praza de España.
Tras a tirada de lumes de medianoite, continuou a verbena. Iso si, unha vez que se baixou o pano no escenario da praza de España, púxose fin ás festas do Carme. Ata o ano que vén.
BALANCE POSITIVO DO CONCELLO
O goberno municipal que dirixe María Ramallo fixo este mércores unha valoración "moi positiva" das súas festas patronais, destacando que todas as actividades desenvolvéronse con gran éxito.
Os concertos, a devoción do público polas orquestras, as actividades de nenos, a Batalla de Flores, os festivais de bandas de música e folclóricos, o intenso día do Carme cos actos na Escola Naval ou a procesión marítima, sinalaron desde o Concello, contaron cun "respaldo importante de xente" e un tempo que permitiu gozar das terrazas, da hostalería ou do ambiente propio destas datas, "visitándonos moitas persoas de fóra de Marín que quixeron gozar destes días tan intensos".
Desde o concello agradecen, por tanto, o intenso traballo dos servizos municipais e das diferentes asociacións que colaboraron nestas festas.