Marín abre a súa nova casa cultural: "Era unha ilusión e, sobre todo, unha cuestión de xustiza"

Un soño cumprido. Así se viviu en Marín o que, sen dúbida, foi un día para a súa historia. Centos de persoas non quixeron perder a inauguración do novo auditorio, o recinto que converte o Paseo Alcalde Blanco nunha auténtica "cidade cultural".

"Non sabedes que felicidade máis grande sinto vendo estas butacas con público, con persoas cheas de ilusión por estar hoxe aquí", destacou a alcaldesa de Marín, que recoñeceu que era "difícil non emocionarse" tras tanto tempo "soñando" con este auditorio.

María Ramallo lembrou que chegar a este momento "non foi nada fácil", non só polo custo económico, senón por toda a súa tramitación nun camiño que "parecía eterno" e que culminou coa súa apertura á cidadanía.

A rexedora subliñou que Marín puido celebrar por fin a entrega das chaves "das que vai ser a nosa futura casa cultural", onde os marinenses "viredes pasalo ben, a rir, a emocionarvos, a romper coa rutina, a falar e a relacionarvos".

Que o municipio poida contar con este auditorio, que ten unha capacidade para 500 persoas, "era unha ilusión e, sobre todo, unha cuestión de xustiza".

Marín, segundo a alcaldesa, "mereciámonos un espazo digno" e non ter que conformarse sempre con espazos "aos que lles temos cariño" pero que non tiñan as características necesarias para poder dar un "salto de calidade" na programación cultural.

A partir de agora, segundo Ramallo, o goberno municipal está en disposición de dar o seguinte paso, a xestión cultural do recinto e dotalo dunha programación "estable, dinámica, completa e ambiciosa".

Na inauguración do novo recinto, que estivo apadriñada polo gaiteiro Carlos Núñez, participou, entre outras autoridades, o presidente da Xunta de Galicia, Alfonso Rueda.

Durante a súa intervención no acto, Rueda destacou que este auditorio, financiado polo seu goberno, exemplifica a aposta da Xunta por levar a cultura a todo o territorio.

O executivo galego achegou preto de 2,7 millóns de euros para unha obra que "responde a unha demanda da vila", sostivo o presidente, e que está convencido de que suporá un "pulo importante" para a dinamización cultural, social e turística de Marín.

Apuntou ademais que este espazo abre as súas portas coincidindo cun "excelente momento" da cultura galega e ás portas do Xacobeo 2027, no que haberá unha aposta "moi intensa" pola programación cultural en toda Galicia.