O Concello de Marín avanza na rehabilitación de infraestruturas viarias rurais.
Nesta ocasión, o goberno local puxo en marcha a segunda fase do proxecto de mellora da estrada de acceso a Pastoriza, unha vía que consideran unha "prioridade" nos investimentos no rural.
Tras a execución da primeira fase o pasado ano, redactaron un novo proxecto técnico que contempla a rehabilitación do firme, a ampliación da calzada en puntos conflitivos e a mellora da drenaxe.
O obxectivo destas actuacións é garantir a durabilidad e seguridade da vía, facilitando o acceso tanto para vehículos agrícolas como para residentes e visitantes.
O proxecto conta cun investimento de case 39.000 euros solicitado á Axencia Galega de Desenvolvemento Rural, a través do Plan Camiña Rural 2025-2026.
Inclúe a eliminación parcial da capa existente do firme, a súa reposición con mestura bituminosa, a ampliación da calzada a un mínimo de 5 metros (chegando a 6 metros en curvas) e a mellora da drenaxe mediante a apertura de cunetas, pavimentación de tramos e instalación de drenaxes.
Desde o Concello sinalan que estas melloras non só aumentarán a seguridade viaria, facilitando o cruzamento de vehículos e mellorando a visibilidade, senón que tamén preservarán o firme da calzada, alargando a súa vida útil e evitando a contaminación do solo e as augas subterráneas.
O proxecto foi deseñado cumprindo estritamente a normativa vixente, incluíndo o Plan Xeral de Ordenación Municipal (PXOM).