Marín consolida a súa rede de colonias felinas con máis de 170 animais rexistrados

"Balance positivo" en Marín tras implantar o programa municipal de control etico de colonias felinas mediante o método CER (Captura, Esterilización e Retorno), en colaboración coa Deputación de Pontevedra.

A concelleira Mónica Viqueira visitou este luns a colonia felina de Méndez Núñez-Fondo do Saco, unha das que xa conta co panel informativo, para facer balance do programa e explicar as seguintes fases.

Desde a súa posta en marcha, fíxose o esterilizado, vacinado, desparasitado e chipeado de 171 gatos e gatas comunitarios, permitindo avanzar de maneira decisiva no control da poboación felina do municipio.

O programa inclúe tamén a atención veterinaria básica e de urxencia, como poden ser gatos atropelados ou con outras incidencias.

Outro dos alicerces é a alimentación controlada, distribuíndo ao longo deste período un total 765 quilos de penso entre as persoas coidadoras autorizadas.

Así mesmo, instaláronse elementos de refuxio na colonia de Fondo do Saco, unha medida que o goberno local prevé estender progresivamente a outros puntos do municipio para mellorar o benestar animal, a salubridade e a contorna.

Na actualidade, Marín conta con 23 colonias felinas rexistradas, que están a ser identificadas con novos paneis informativos.

Estes carteis lembran que os animais están sometidos a control continuo mediante o método CER, está prohibido causarlles dano, retiralos ou abandonar novos exemplares.

Tamén se establece que a alimentación só pode ser realizada por persoas acreditadas nos puntos autorizados.

"É fundamental que cada colonia siga unhas normas para garantir o benestar dos animais, a limpeza e a convivencia", subliñou Viqueira.

Así mesmo, a edil convidou as persoas interesadas a sumarse ao programa como colaboradoras a través do correo municipal alcaldia@concellodemarin.es, á vez que puxo en valor o papel do voluntariado xa que "nada disto sería posible sen o seu compromiso e dedicación".