O Concello de Marín convocou diversas mesas de participación pública para poder seguir avanzando no Plan Especial de Protección e Reforma Interior (PEPRI) do Casco Vello e o Barrio de Cantodarea.
Despois de contactar cos grupos políticos da Corporación Municipal, estas xornadas pretenden escoitar a veciños e sectores implicados para asentar as bases de mellora e conservación dos barrios.
As sesións celebraranse no Museo Torres.
A primeira será o 11 de marzo ás 19:00 horas e reunirá á veciñanza e persoas propietarias do Casco Vello e de Cantodarea.
Na xornada explicaráselles o marco normativo dos barrios, os obxectivos da rehabilitación e limitacións do centro histórico.
Despois, as persoas asistente dividiranse por zonas para identificar problemas e propor de maneira común as solucións.
O 12 de marzo haberá dúas sesións. Unha ás 09:30 horas dirixida a asociacións comerciais, hostaleiros e negocios e outra, ás 12:00 horas, de mobilidade dirixida a Policía Local e transportistas.
A mesa de cos axentes da construción será ao día seguinte, o 13 de marzo, ás 09:00 horas, onde se reunirán o Colexio Oficial de Arquitectos de Galicia (COAG), promotoras, construtoras e a Área de Urbanismo.
Desde o Concello sinalaron que a participación de todos os axentes é "clave" para garantir un desenvolvemento que respecte tradición e fisionomía local.