Este xoves abriuse o prazo para a reserva de entradas para a proba piloto das verbenas, que se celebrará de forma simultánea en diversos concellos de Galicia e que traerá a Marín á orquestra Marbella o día 19 ás 21 horas. En cuestión de horas, reserváronse máis de 800 pases cos que o aforo, de 1.000 persoas, está xa case completo.
Ao mesmo tempo, no Concello tivo lugar este xoves unha reunión para coordinar o dispositivo de seguridade do evento. A alcaldesa María Ramallo, xunto cos concelleiros Manuel Santos e Marián Sanmartín, ademais de responsables da empresa encargada de organizar o concerto encargáronse de revisar o recinto e a capacidade das entradas e saídas para que se cumpran todas as medidas de seguridade.
Aínda así, as autoridades reiteran a súa petición de colaboración á cidadanía e lembran a necesidade de reservar a entrada con anterioridade para poder acceder.
O aparcamento da Praza de España, na que se celebrará a verbena, debe quedar libre de coches o día 18 a partir das 15 horas.