O pincho 'Marín forever' creado e servido polo Bar Kore II converteuse no gañador do II Roteiro Marín pincho a pincho que se desenvolvía no municipio durante a fin de semana, coa participación de catorce establecementos hostaleiros.
Durante a serán deste domingo 6, a organización a cargo da asociación cultural e gastronómica Botón de Ancla entregaba no Palco da Música da Alameda Rosalía de Castro os trofeos e diplomas acreditativos aos responsables dos establecementos gañadores. Tamén se entregaban as viaxes-regalo aos tres primeiros clasificados.
O segundo posto foi para 'Illa de Tambo' de Hamburguesería Xainza e 'Moeeiña da Terra' de Cafetería Polymnia lograba o terceiro premio. Ambos empataron na primeira votación co pincho 'Guiño al Carine', do Restaurante O Qüenco de Aguete. O xurado formado por profesorado da Escola de Hostalería Carlos Oroza de Pontevedra viuse obrigado a efectuar unha segunda votación para resolver o empate, segundo informan os organizadores.
O Dúo La Rosa e Antonio Miniño amenizaron musicalmente a entrega de trofeos. E o grupo de Gaitas Os de Marín ofreceron un pasacalles durante a mañá do domingo dentro das actividades programadas pola organización, que contou coa colaboración do Concello de Marín.