Pontevedra celebrou este venres a edición número 51 do Día da Muiñeira, que organiza a Asociación Duos Pontes.
Como vén sendo tradición desde fai xa máis de medio século, o folclore, a música e o baile volveron encher as rúas da Boa Vila.
Os grupos participantes concentráronse na Praza do Teucro, ás 19:00, e desde alí partiron en desfile polas rúas de Pontevedra ata a avenida de Montero Ríos.
Debido á instalación provisional de aulas no paseo polas obras do IES Valle Inclán, os grupos distribuíronse a continuación das casetas-aula.
Ás 20:00 deu comezo a mostra de baile, na que os menores de 8 anos, bailaron a Muiñeira de Mariñán; os de 8 a 13 anos, bailaron a Muiñeira de Fozara; e os maiores de 13 anos, bailaron a Muiñeira dos Peruchos.
Ao remate, interpretouse unha jota, a de Paulino e un pasodobre, "O galo d’ouro".
O fin de festa contou coa participación do público para gozar todos xuntos do baile e da música tradicional.