A rúa Condesa, na parroquia de Barrantes no municipio de Ribadumia, presenta unha nova cara tras a finalización das obras de humanización que transformaron por completo este espazo urbano.
Luis López, presidente da Deputación de Pontevedra, visitou este mércores a zona para comprobar o resultado final dos traballos, valorados en 650.000 euros, dos que o ente provincial achegou o 70% (455.000 euros).
A actuación, moi agardada pola comunidade educativa local, supuxo unha transformación integral dunha vía con alto fluxo de persoas debido á proximidade do colexio e as instalacións deportivas.
Durante a visita, o presidente provincial destacou que esta intervención "marca un fito importante" ao ser o primeiro convenio que aprobou como presidente da Deputación.
O proxecto incluíu a reposición do asfalto, a ampliación das beirarrúas e a incorporación de pasos de peóns sobreelevados para garantir a seguridade dos viandantes. Ademais, creáronse novas prazas de estacionamento, habilitáronse zonas axardinadas, instalouse novo mobiliario urbano e soterráronse as liñas eléctricas e de telecomunicacións.
Luis López salientou que, contrariamente ao que adoita ocorrer noutras humanizacións, neste caso incrementáronse "notablemente" as prazas de aparcamento, mellorando tanto a mobilidade peonil como a circulación de vehículos.
O presidente provincial agradeceu especialmente a colaboración da veciñanza polas cesións de terreos necesarias para executar a obra, e destacou o papel do alcalde David Castro nas negociacións: "Onde moitos van a expropiacións, el consegue cesións".
A transformación da rúa Condesa permitirá aumentar a seguridade viaria no considerado "pulmón de Ribadumia" ao tratarse dun espazo moi transitado.
