Poio recuperará en setembro unha das súas probas deportivas máis emblemáticas, a Subida á Escusa, tras a suspensión do ano pasado pola covid-19. Con motivo da proba, o goberno municipal decidiu acometer unha serie de traballos de mellora no pavimento da estrada.
En concreto, os operarios están a actuar no tramo entre Os Canos e Río Mouro Grande.
O obxectivo destas obras é corrixir unha serie de deficiencias detectadas no firme e eliminar raíces fixadas nas inmediacións da estrada e que dificultaban o tránsito de vehículos.
Por outra banda, o que tamén se pretende é ter esta estrada nas mellores condicións posibles de cara á celebración da Subida á Escusa. A intención da Concellería de Deportes é que esta competición sirva como antesala de cara a poder acoller o Campionato de España.
O orzamento destinado a esta obra, que estará rematada nos próximos días, é duns 20.000 euros.