O Concello de Marín sorteará catro bonos turísticos por valor de 500 euros entre todas aquelas persoas que, entre o 1 e o 17 de marzo, fagan as súas compras no comercio local.
Así se recolle na campaña de dinamización comercial impulsada polo goberno municipal e que foi presentada este venres pola edil responsable da área de comercio, Cristina Acuña.
Os obxectivos da iniciativa son apoiar ao comercio local "nun momento onde o consumismo aumenta", favorecer a un sector que sufriu nos últimos anos como son as axencias de viaxes e premiar a fidelidade dos que apostan polo comercio local para facer os regalos do Día do Pai.
Os participantes deberán realizar compras superiores a 30 euros en calquera establecemento de Marín, a excepción da hostelería, supermercados, farmacias e gasolineiras, os cales quedan excluídos desta iniciativa.
No caso de ser un único ticket superior a 30 euros, se deberá ao reverso do ticket escribir o nome e apelidos, DNI e número de teléfono. Se son un conxunto de tickets, deberán graparse e no reverso escribir nome e apelidos, DNI e número de teléfono da persoa participante.
Os tickets deberán ser orixinais, polo que en caso de ser necesarios para garantías ou devolucións será necesario pedir un duplicado no momento da compra ou servizo.
Estes recibos, debidamente cubertos deberán ser depositados no buzón habilitado na caseta da oficina de turismo da Praza de España antes do 18 de marzo.
Ao día seguinte, 19 de marzo, Día do Pai, celebrarase o sorteo no salón de plenos do Concello.
Os bonos turísticos de 500 euros de valor cada un, que poderán ser utilizados dende a súa entrega ata o 31 de decembro, terán que contratarse nalgunha das catro axencias de viaxes locais: Viajes Dysa, Viajes Rascado, Viajes Corbera y Viajes Deza Marín.
Engade Pontevedra Viva como fonte preferida de Google de balde
Mantente informado coas últimas noticias de actualidade.